Avokati i Popullit i kërkon ministrisë së Drejtësisë, një institucion të posaqëm për këta persona
Avokati i Popullit, Igli Totozani, kërkon nga Ministria e Drejtësisë, të gjenden zgjidhje ligjore për largimin nga burgjet të personave me probleme mendore. Totozani i ka kërkuar ministrit të drejtësisë të merren masat që personat të tillë të nxirren jashtë sistemit të burgjeve dhe të kalohen në institucione të posaçme mjeksore, në varësi të Ministrisë së Shëndetësisë.
Në rekomandim argumentohet se: “Në vendin tonë, aktualisht, nuk ka një institucion të veçantë mjeksor për persona që vuajnë nga turbullime psiqike ose neuropsiqike. Këta persona nuk duhet të mbahen në burgje, por në institucione të veçanta mjeksore, të cilat duhen ngritur sa më shpejt të jetë e mundur”.
Duke ju referuar dokumentit, “Mbi Rregullat Europiane të Burgut”, miratuar nga Këshilli i Europës dhe deleguar për zbatim me Rekomandimin me Nr.87/3 të Këshillit të Ministrave të vendeve anëtare nëpërmjet shumë rregullave të këtij dokumenti veçohet pika 100.1 që përcakton se: “Personat që konstatohen me probleme të shëndetit mendor nuk duhet të mbahen në Burg, por duhet të dërgohen sa më shpejt që të jetë e mundur nga Burgjet, në vende të përshtatshme për këtë kategori personash”.
