Kandidatja e PS për deputetet në Tiranë, inxhinierja e njohur Luljeta Bozo ka bërë një hap pas në lidhje me deklaratat e saj për Enver Hoxhën dhe sistemin komunist.
Në një intervistë të fundit në “Java News”, Bozo shpreh një tjetër mendim për kohën e diktaturës.
E pyetur se çfarë dëmesh i ka shkaktuar Enver Hoxha dhe figura e tij kombit shqiptar në emisionin “Dekalog” ajo tha se po t’i vësh në balancë, ka më shumë anë pozitive sesa negative.
Sipas saj, kush kapet pas Enverit për të sulmuar të tjerët është në fakt një zëdhënës i pavetëdijshëm i së keqes së asaj diktature.
Së fundmi është komentuar një intervistë e juaja ku ndër të tjera flisni edhe për periudhën komuniste të vendit. Media, por edhe një pjesë e politikës, e kanë interpetuar deklaratën tuaj si një vlerësim pozitiv për regjimin komunist. Por cili është në fakt, qëndrimi juaj për atë periudhë të historisë sonë?
Unë kam një jetë të jetuar me parimet e me punën time dhe bindjet e mia as nuk i kam negociuar, as kam ndërmend t’i negocioj në këtë moshë me askënd! Për më tepër nuk kam ndërmend të merrem me ata që merren me shtrembërimin e fjalëve te mia, për qëllime të rëndomta politike. Diktaturën komuniste e dënoj me forcë dhe Enver Hoxha padyshim ishte një diktator. Por refuzimi i çdo relativizimi të krimeve të diktaturës, nuk më pengon dot të vlerësoj me respekt shkencëtarët dhe profesionistët e asaj kohe dhe gjithë popullin e thjeshtë që kanë punuar me ndershmëri. Pafuqia për të mos e parë atë kohë vetëm bardhezi është sindromë e sërvilëve apo spiunëve të atëhershëm, që janë “xhelatët” e mendimit ndryshe të këtyre 30 vjeteve. Kush kapet pas Enverit për të sulmuar të tjerët është në fakt një zëdhënës i pavetëdijshëm i së keqes së asaj diktature. Ata që shajnë, akuzojnë dhe shtrembërojnë njësoj si xhelatët e mendimit ndryshe asokohe. Ekstremet përputhen dhe më kujtohet Vaclav Haveli që thotë: Komunisti më i zi është komunisti antikomunist! Kam vetëm keqardhje per ta.
