“Migrimi do të kompesojë plakjen e popullsisë në vendet e Bashkimit Evropian”
Vendet kryesore të zhvilluara të Europës do të pësojnë rënie të numrit të popullsisë, ku në krye të listës qëndron Gjermania. Por të dhënat e raportit më të fundit të Eurostat sugjerojnë se vendet e Ballkanit si Shqipëria do të ofrojnë tjetër panoramë në vitet e ardhshme, ku rritja e popullsisë do të vazhdojë për shkak të arsyeve natyrore. Të dhënat tregojnë se Shqipëria, Bosnja dhe Hercegovina dhe të tjera vende të rajonit si Mali i Zi dhe Maqedonia do të vijojnë rritjen e popullsisë, ku si arsye e vetme e kësaj tendence citohen faktorët natyrorë.
Ndërsa vendet e tjera ballkanike, Serbia e Kroacia kategorizohen te grupi i vendeve që nga arsye natyrore si rënia e fertilitetit, përhapja e sëmundjeve etj. do të pësojnë rënie të popullsisë.
Tendenca të dyanshme parashikohet të ketë edhe në vendet e tjera europiane. Belgjika, Danimarka, Spanja, Luksemburgu e Britania e Madhe do të kenë një rritje të popullsisë, por që ndryshe nga vendet e Ballkanit nuk do të vijë për shkaqe natyrore, por si rrjedhojë e migracionit neto.
Projeksionet sugjerojnë se vende si Greqia, Portugalia, Bullgaria, Sllovakia dhe Letonia do të mund të shohin një rënie drastike të 1/3 së popullsisë deri në 2080. Sipas projeksioneve të Eurostat në 2080, popullsia britanike mund të arrijë më shumë se 85 milion ndërsa popullsia e Gjermanisë do bjerë nga 80 në 65 milion.
