Kosova renditet në të njëjtin nivel bashkë me Maqedoninë, Malin e Zi e Bosnjen
Shqipëria dhe Kosova janë vende pjesërisht të lira. Edhe këtë vit, Organizata Freedom House, e rendit vendin tonë dhe Kosovën, në mesin e vendeve me liri të kufizuar. Të njëjtin vlerësim kanë marrë edhe vendet fqinje si Maqedonia, Mali i Zi dhe Bosnja e Hercegovina. Sipas Freedom House, Serbia ka bërë hapa përpara këtë vit në parametrat që përcaktojnë lirinë e një vendi. Serbia është rendiotur për vitin 2015 në vendet e konsideruara të lira.
Shqipëria ka të njëjtën shkallë vlerësimi, duke marrë 3 pikë për gjendjen e lirisë në përgjithësi, në një sistem matës me një shkallë nga 1 në 7, ku 1-shi përfaqëson liritë më të mëdha dhe 7-ta mungesën më të madhe të lirive.
Kosova sa u përket të drejtave politike ka marrë notën 3 nga 4 sa ishte nje vit me pare, ndërsa për liritë civile, vlerësimi është i pandryshuar në 4. Një ndër parametrat përcaktues për këtë vit për vendet e ballkanit është edhe cilësia e qeverisjes. Sipas raportit, Kosova, Bosnja dhe Maqedonia përmenden si vende që janë përballur me qeverisje jofunksionale. Ndërsa për qeverinë e Bosnjes vazhdon të jetë problem korrupsioni endemik që ka përfshirë atë vend.
Freedom House thekson se viti i kaluar ishte i dhjeti me radhë gjatë të cilit është shënuar rënie e lirive në shkallë botërore, duke përmendur sulmet terroriste që kanë ndodhur gjatë vitit2015.
Në raport janë përfshirë 195 vende, nga të cilat 86 janë radhitur si të lira, 59 si pjesërisht të lira dhe 50 si jo të lira.
