Nënkryetari i AAK-së, Xhafer Gashi, është shprehur se kreu i partisë së tij, Ramush Haradinaj, është kandidati më i denjë për postin e presidentit të Kosovës. Në një intervistë për KosovaPress, Gashi deklaron se Specialja është duke kryer rolin e një gjykate serbe, ndërsa flet edhe për rikandimimin për një tjetër mandat në krye të Obiliqit.
Duke iu kthyer postit të presidentit, Gashi u shpreh se Ramush Haradinaj e ka dëshmuar si njëri i unitetit dhe që ka dhënë shumë për republikën në dekadat e fundit. Po ashtu, ai shtoi se edhe formulat politike brenda koalicionit i japin të drejtë që AAK-së që të propozojë presidentin.
“Posti i presidentit i takon Aleancës për Ardhmërinë e Kosovës sepse edhe formulat politike, koalicionet të çojnë në këtë drejtim. Pastaj, kandidati i Aleancës është Ramush Haradinaj, i cili në të gjitha kohërat, edhe para luftës, edhe gjatë luftës, por edhe pas luftës e ka dëshmuar si njëri i unitetit, si njeri që ka dhënë shumë si familje, për Republikën, dhe shpresoj që të jetë kështu dhe përfundimisht të bëhet edhe president i vendit”, ka thënë Gashi.
Gjykata Speciale ka ngritur aktakuzat e para ndaj ish-krerëve të Ushtrisë Çlirimtare të Kosovës dhe për Gashin disa veprime të këtij institucioni janë të papranueshme.
Në intervistën për KosovaPress, Gashi që ka qenë vet pjesë e UÇK-së, u shpreh se Specialja po e luan rolin e një gjykate serbe.
“Janë të papranueshme dhe është fatkeqësi. Unë konsideroj që Gjykata Speciale është duke e kryer një punë të gjykatës së Serbisë dhe kryesisht janë duke punuar me dokumentacion të cilat i ka ofruar dhe po e dëshmon edhe vet shteti serb. Mbi 50 mijë faqe, dëshmi të ndryshme që janë të falsifikuara. Ne e njohim Serbinë dhe është fatkeqësi që çlirimtaret tanë të gjenden tani atje dhe unë shpresoj se ata do të dalin fitimtarë, sikur se edhe në betejat e mëhershme”, ka thënë Gashi.
Zgjedhjet lokale pritet të mbahen vitin e ardhshëm dhe Xhafer Gashi pritet të kërkojë besimin e qytetarëve të Obiliqit edhe për një tjetër mandat për të qenë kryetar i tyre. Ai ka pranuar se brenda strukturave të AAK-së ka një disponim që ai të garojë sërish por që pret konfirmimin zyrtar.
“Ne kemi pasur disa takime që janë organizuar me qendrën dhe faktikisht mua më është dhënë besimi që të vazhdojë edhe për një mandat, por besoj që është ende herët për ta konfirmuar se a do të jem apo jo”, thotë Gashi.
