Mjeku kirurg Albert Troci në një lidhje me Skype nga Italia në “Abc-ja e mëngjesit” foli për situatën e Covid-19 në shtetin fqinj. Ai u shpreh se Italia ka futur disa rajone në zonën e kuqe, të verdhë dhe portokalli, Sipas tij, masat e marra nga autoritetet ishin të nevojshme për shkak se numri i rasteve është rritur ndjeshëm dhe sistemi shëndetësor nuk mund ta përballojë një fluks të tillë.
“Italia është ndarë në tre shtresa. Zona e kuqe, portokalli dhe e verdhë. Kemi patur një ndarje me shumë shqetësime dhe protesta dhe për futjen dhe mënyrën e ndarjes së zonave. Dje u treguan 21 indikator për ndarjen në kto zona. Të kuqet nuk kemi shtrëngim si në Mars, por me light ku një person ka mundësi të lëviz kur ka nevojë për të kryer diçka jetësore. Shkollat deri në klasë të 7-të janë të hapura dhe në zonat e kuqe. Kurse të tjerat po zhvillohen në distancë. Mund të themi që kjo ishte e nevojshme sepse po jetojmë një kolaps.”, tha mjeku.
Më tej, ai shtoi se rritja e numrit të rasteve ka bërë që gjurmimi i kontakteve të jetë pothuajse i pamundur. “Në këto momente gjurmimi i kontakteve ka dalë jashtë dore, nuk arrijmë të bëjmë kontaktet. Numri dhe prezenca në terren është aq e madhe saqë është e pamundur të bësh gjurmimin e kontakteve. Pavarësisht numrit të lartë të tamponeve vetëm dje janë kryer 220 mijë tampone, kontaktet janë humbur.”, tha më tej mjeku.
