Kryetari i Partisë Demokratike Lulzim Basha ka kërkuar largimin e ministrit të Brendshëm Sajmir Tahiri dhe të drejtorit të Përgjithshëm të Policisë së Shtetit Haki Çako për t’i hapur rrugë hetimit për skandalin e përgjimeve nga ana e policisë. Këtë deklaratë, Basha e bëri para selisë së PD, pasi u pyet nga gazetarët në lidhje me këtë çështje. “Largimi i Tahirit dhe i drejtuesve të lartë të policisë është parakusht për hetimin e Prokurorisë”,- tha kreu i demokratëve. Basha përsëriti disa herë kërkesën që ministri Tahiri dhe drejtuesit e policisë të largohen nga detyra, në mënyrë që t’i hapet rrugë Prokurorisë të bëjë një hetim të qartë për pajisjen ilegale të policisë.
Lidhur me këtë skandal, sot në Komisionin e Sigurisë Kombëtare raportuan ministri i Brendshëm, Sajmir Tahiri, kreu i SHISH, Visho Ajazi, Drejtori i Përgjithshëm i Policisë së Shtetit, Haki Çako dhe kryeprokurori Adriatik Lalla, i cili tha se ka nisur hetimi duke e konsideruar vepër penale.
Adriatik Llalla tha se hetimi ka nisur mbi bazën e informicionit të drejtorit të përgjithshëm të SHISH dhe të dhënave të tjera përfshi dhe të dhëna mediatike
“Hetimi lidhur me rastin ka vetëm 5 ditë që ka nisur, më datën 13 dhe brenda këtyre ditëve prokuroria ka kryer një sërë veprimesh hetimore dhe është më fazën e kryerjes së veprimeve të mëtejshme për t’iu përgjigjur kësaj çështje të rëndësishme të sigurisë kombëtare. Prokuroria ka krijuar një grup hetimor që po punon me intensistet për të përfunduar në një kohë sa më shpejtë të këtyre hetimeve. Lidhur me rastin që përmendët me hetimet e kryera para disa kohësh lidhur me një pajisje tjetër përgjimi e marrë nga ministria e Mbrojtjes disa vite më parë, hetimet në këtë rast ende nuk kanë përfunduar”, tha Llalla.
I pyetur nga deputeti Piro Lutaj nëse prokuroria ka pengesa nga autoritete të qeverisë shqiptare për ta zbardhur çështjen, Llalla tha se “Kodi Penal parashikon dhe veprën penale që pengojnë zbulimin e së vërtetës. Nëse prokuroria do të hasë pengesa në kryerjen e hetimeve hetimore ka të gjitha mundësitë për të nisur hetimet”.
Llalla tha me tej se “si informacioni gojor i kreut të SHISH, të dhënat të tjera mediatike është detyrim i prokurorit në çdo rast është kur konstaton një vepër penale, ose kur ka dyshime për një vepër penale, të nisë menjëherë hetimin, aq më tepër kur bëhet fjalë për një vepër penale që cënon sigurinë kombëtare”.
Ai u rezervua ne permendje emrash duke theksuar se “Hetimi do të zbardhë të gjitha rrethanat, nëse kjo pajisje është futur në rrugë ligjore, nëse është përdorur në rrugë ligjore apo jo. Prokuroria është e angazhuar maksimalisht për ti dhënë një zgjidhje këtij rasti që ka interes publik”.
