Raporti i KE: Shqipëria me rritjen më të ulët vjetore
Me një rritje ma bazë vjetore 0.3 për qind në vitin 2015, Shqipëria ka ecurinë më të dobët në gjithë rajonin. Shifra është dhënë në raportin e Komisionit Europian për shtetet kandidate ku gjithashtu thuhet se Shqipëria rezulton vendi me rritjen më të ulët vjetore edhe të depozitave bankare. Të dhënat krahasuese të raportit të tremujorit të parë 2016 të Komisionit Europian tregojnë se Shqipëria rezulton vendi që ka pasur rritjen më të ulët vjetore si të kredive ashtu dhe të depozitave.
Sipas raportit të Komisionit Europian, rritja vjetore e kredisë në Ballkanin Perëndimor në 2015-n ka mbetur përgjithësisht pozitive për shkak të normave të ulëta të interesit. Kjo e fundit ka bërë që huaja të rritet ndjeshëm për individët, ndërsa kredia për bizneset veçanërisht firmat e mesme dhe të vogla, ka mbetur përgjithësisht e zbehtë. Edhe për depozitat Shqipëria ka shënuar rritjen më të ulët në rajon, me 1.9 për qind me bazë vjetore në 2015-n. Të gjitha shtetet e tjera të Ballkanit Perëndimor, me përjashtim të Shqipërisë kanë shënuar një rritje vjetore të depozitave me më shumë se 6 për qind.
