Prefekti i Kukësit Zenel Kuçana ka kritikuar ashpër drejtuesit e institucioneve kryesore, për të cilët thotë se nuk po e kryejnë si duhet punën e tyre, pasi të infektuarit me COVID-19 që ata duhet të mbikqyrin po dalin në rrugë.
“Mjeku i familjes, policia nuk i kanë në mbikqyrje të plotë, pasi ka raste që këta dalin nga familjet e tyre dhe shkojnë në pazar, tek spitali, tek marketi. Ka një kod penal, këta janë si një njeri që del me automatik në pazar dhe vret njerëz kjo s’vret menjëherë po i vret avash pas një jave a dy javësh”, tha Kuçana në Abc News.
Ai e vuri theksin te ceremonitë martesore dhe mortore, ndërsa u kërkoi zyratrëve të punojnë me seriozitet, ose në të kundërt do të mbajnë përgjegjësi.
“Vazhdojnë të bëhen dasma dhe në qytet, ku restorante janë të mëdha me 200 vetë. Edhe vakitë duhet të minimizohen. Në qytet ende ka banorë pa maska. Nuk kanë ndërgjegjësuar qytetarët që duhet të ruajnë veten. Nuk vini gjoba. Që nga policia e shtetit, ajo bashkiake, inspektoriati shtetëror shëndetësor.
Keni të bëni me jetën e njerëzve. Nëse vazhdoni me këtë impakt do jeni përgjegjës kundrejt qytetarëve për mosmarrjen e masave të duhura për parandalimin e infektimit. Ju them të jeni korrekt dhe serioz në punë. Nuk mund të vazhdohet më me këtë rritëm.”
