Kaskada e Drinit, prodhoi rreth 20 mijë megavat orë energji në ditë
Moti i muajve të fundit ka qenë një fat për korpotratën elektroenergjetike. Reshjet e shumta kanë mundësuar që kaskada e Drinit të prodhojë me kapacitet të plotë. Vetëm për 20 ditët e para të muajit maj KESH ka kontraktuar nga shitjet e energjisë mbi 8 milion euro. Sipas të dhënave nga KESH për shkak të prurjeve në rritje KESH po trajton ato nëpërmjet ngarkimit maksimal të mundshëm të agregatëve disponibël në HEC-et e Kaskadës së Drinit, duke rritur prodhimin ditor të energjisë në rreth 20 mijë megavat orë. Që prej dates 1 maj, KESH po mbulon gjithë kërkesën e vendit për energji elektrike, përfshi humbjet e OSHEE-së në rrjetin e shpërndarjes që vlerësohen rreth 84 mijë megavat orë apo e shprehur në vlerë 2.2 milion euro. Ndërkohë sasinë shtesë të energjisë së prodhuar gjatë periudhës 01-22 maj 2016 KESH e ka shitur në tregun e parregulluar. Sasia totale e energjisë së shitur në këtë treg është 227 mijë megavat orë, me një vlerë monetare prej 6 milion Euro. Aktualisht, KESH ka hapur një tjetër procedurë shitje energjie për periudhën 18-22 maj ku ka bërë ftesë për shitjen e rreth 24 mijë megavat orë. Gjatë kësaj periudhe prodhimi ditor i energjisë pritet të rritet në rreth 24 mijë megavat orë. Deri tani në total përmes shfrytëzimit optimal të prurjeve Korporata Elektrenergjitike Shqiptare ka arritur të sigurojë një përfitim financiar prej 8.2 milionë euro në 22 ditët e para të muajit maj. Aktualisht rezerva energjitike e akumuluar është rreth 1.4 milion megavat orë.
