Këtë vit është përgjysmuar sipërfaqja e mbjellë me duhan
Zona e Dumresë, e njohur si prodhuesja më e madhe e duhanit në vend, duket se nuk do të jetë për shumë kohë e tillë. Sapo ka përfunduar procesi i mbjelljes së duhanit dhe ajo që vihet re është fakti se këtë vit fermerët kanë mbjellë 50 përqind më pak dhe sikur të mos mjaftonte kjo, fermerët ende nuk kanë marrë paratë për duhanin e shitur 5 muaj më parë. Pas protestave të shumta dhe disa takimeve në Ministri, fermerët e Dumresë nuk arritën të gjejnë një zgjidhje për të vetmen kërkesë të tyre; heqjen e monopolit në grumbullimin e duhanit. Çdo vit ata përballen me ulje të çmimit të shitjes, të cilin kompania e vetme e licencuar për grumbullimin e duhanit e vendos sipas interesave të saj. Kjo ka bërë që një pjesë e mirë e fermerëve të Dumresë të heqin dorë nga kultivimi i duhanit dhe të mendojnë për mënyra të tjera jetese. Një vit më parë një sasi e madhe duhani, të cilët fermerët nuk pranuan ta jepnin me çmimin qesharak të propozuar nga kompania, u kalb nëpër magazina duke e çuar dëm mundin e një viti të tërë.
