Ministria e Financave konfirmon transfertën nga EUROSIG
Me kalimin e parave privatizimi i kompanisë INSIG zyrtarisht është i mbyllur. Ministria e Financave ka konfirmuar pagësen prej 16 milionë eurosh bërë nga kompania blerëse, EUROSIG. “Pas paraqitjes së propozimit për shpalljen e kompanisë fituese nga ana e Komisionit të Vlerësimit të ofertave, Këshilli i Ministrave i Republikës së Shqipërisë me vendimin Nr.218, miratoi procedurën e tenderimit për shitjen e paketës së 100% të aksioneve të zotëruara nga shteti në shoqërinë “INSIG” sh.a., Tiranë dhe shpalli fitues shoqërinë “EUROSIG” sh.a., Tiranë. Fituesi i tenderit, brenda afateve ligjore, ka kryer pagesën e plotë prej 2.222.122.000 leke”, thekson Ministria e Financave në një deklaratë zyrtare. Sipas Ministrisë, gjatë javës në vijim do të kryhen procedurat e nevojshme për transferimin e plotë të aksioneve të kompanisë, “duke përmbyllur me sukses për herë të parë, pas tre dështimeve të qeverisë së kaluar, procesin e privatizimit të kompanisë shtetërore INSIG”.
