Në spitalin “Shefqet Ndroqi” i cili njihet si covid 2 situata është normalizuar orët e fundit.
Gazetari Erjon Skëndaj, raporton se në 24 orët e fundit ka pasur 4 urgjenca, ndërkaq ka bërë dhe një përmbledhje të pacientëve që po trajtohen në këtë spital.
“Në 24 orët e fundit ka pasur 4 urgjenca, gjatë paradites së sotme 2 ambulanca kanë mbërritur nga Elbasani. Pak më parë mbërriti dhe një ambulancë nga Infektivi.
“Ka 9 persona në terapi intensive, 4 prej të cilëve janë të intubuar. Ka 60 pacientë me tamponë pozitivë dhe 60 pacientë të tjerë me tamponë negativë, por me skaner tipik dhe simptoma të COVID-19.
Nuk dihet se sa persona të shtruar ka ky spital. Ka një bunkerizim të informacionit për spitalin Infektiv. Të vetmet të dhëna janë ato të Ministrisë së Shëndetësisë në buletinin 24 orësh.
Nëse do të bëjmë një zbritje matematikore, nga 206 raste në dy spitalet, nëse do zbresim 120 të shtruarit në Sanatorium, në Infektiv duhet të ketë 80-85 të shtruar për momentin.
Ka dhe qindra persona të tjerë që nuk vijnë në spital por trajtohen me oksigjeno terapi në kushtet e shtëpisë. Ka më shumë se një muaj që mjeku i familjes po luan rolin e tij dhe personat që referohen nga mjeku i familjes vendosen në terapi me oksigjen, medikamente për të mos lejuar trashjen e gjakut dhe për shtimin e imunitetit. Ka shumë pacientë që po marrin me qira oksigjenin në pikat private të shpërndarjes dhe po trajtohen në kushtet e shtëpisë dhe kjo ka bërë që pacientët të qëndrojnë disi më larg spitalit”, deklaroi Skëndaj.
