Kryeministri Edi Rama akuzoi sot Partinë Demokratike se po i shmanget reformës në drejtësi pasi kanë frikë se reforma do të shembë piramidën e sotme të drejtësisë. Duke folur në Kuvend Rama e ftoi PD-në të votojë, por ndërkohë e akuzoi se i trembet reformës.
“ Ju i shmangeni reformës në drejtësi si djalli temianit, dhe nxirrni vetëm pretekste, përralla vetëm për të shtyrë reformën në drejtësi. Dje ishte e fundit: Nuk ka rëndësi koha por cilësia! Por si do bëhet më cilësore reforma në drejtësi. Duke i mbyllur derën siç mbyllet një shishe verë dhe duke e lënë të vjetërohet vetë?! Hajde pra uluni në tavolinë dhe të punojmë bashkarisht për cilësinë. Ju i ikni reformës në drejtësi sepse ajo bën dy gjëra: E para e shemb përtokë piramidën e sotme të sistemit të drejtësisë dhe të gjithë strukturat dhe mekanizmat që ju sot i kontrolloni bien, dhe ndërtohet një sistem tërësisht i ri ku kapaciteti i influencës politike dhe vendimmarrjes përmes pazareve të partive politike minimizohet. Dhe ndërkohë janë struktura të krijuara brenda sistemit të cilat mundësojnë promovimin në pozita drejtuese apo kyçe të të gjithë njerëzve të sistemit. Nga ana tjetër promovimi i kujtdo në sistem nuk do të bëhet duke peshkuar në kënetën tuaj. Por do të bëhet pasi të thahet këneta, me sistemin e vetingut të monitoruar nga ndërkombëtarët. Nuk do të ketë as Gjin as Gjon që mund të kalojë sistemin e vetingut nëse është i kompromentuar me vendimmarrje në të shkuarën apo në rast se ka gjëra për ti treguar në ditën e diellit lidhur me të shkuarën e vet. Këto dy shtylla të sistemit të ri të drejtësisë janë dy arsyet themelore pse ju i ikni, i ikni dhe i ikni reformës në drejtësi. Sa për atë që citoi kryetari i grupit,se kur sma thotë mua goja, llogariteni sa keq ndiheni ju, lidhur me çfarë tha ambasadori amerikan lidhur me ju unë nuk merrem me cfarë thuhet pas dyerve. Ka të tjerë që e kanë atë zanat. Unë di të them. Lëreni këtë valle dhe uluni t’i japim fund kësaj historie që po bëhet gjithmonë e më shumë një barrë e rëndë në kurriz të këtij populli e vendi që meriton të çelë negociatat këtë vit për tu bërë anëtar i BE-së dhe për hir të së drejtës për të pasur drejtësi meriton të shembet ky sistem para syve të vet siç e garanton kjo reformë. Lërini alibitë se nuk ju shpëton as Frroku, as Rroku, as Noku, as Shulla, as Hazi, as Shullazi as Saliu. Nuk ju shpëton dot nga reforma në drejtësi.”, tha Rama sot në foltoren e parlamentit.
