Tirana mbetet klubi më i penalizuar, pasi dhuna në përfundim të derbit me Partizanin pothujase e ka tronditur të gjithë strukturën e klubit. Komisioni i Disiplinës ka dhënë dënime të gjata për drejtuesit më të lartë të klubit bardheblu, madje drejtori Saimir Shehri mori një dënim 1-vjeçar, i cili iu bashkangjit një të mëparshmi që ishte 2-vjeçar. Ndërkohë që tifozët u ndëshkuan me 8 javë mos pjesmarrje, megjithëse nuk ishin fare palë e sherreve të derbit. Kapiteni Muça u dënuar me 1 vit pezullim sepse humbi mendjen dhe të gjitha këto masa të rënda për 24 herë kampionët e vendit. Ndërsa për një mori ndeshjesh të trukuara nuk është marrë asnjë masë nga komisionet kompetente të Federatës Shqiptare të Futbollit. Dhe në këtë rast nuk bëhet fjalë për lëshime që në një 90 minutësh kërkojnë sy të specializuar për t’i dalluar, por në të kundërt për rezultate që i kanë fyer jo vetëm ata që popullojnë shkallët e stadiumeve, por në përgjithësi të gjithë njerëzit e futbollit. 6-7 ka përfunduar Besëlidhja – Mamurrasi dhe të gjitha golat për lezhjanët u shënuan nga i njëjti futbollist, për të fituar Këpucën e Artë. Po për të njëjtën arsye ka përfunduar 4-5 edhe ndeshja Erzeni – Ada. Edhe kjo sigurisht që është dhunë, madje po aq e dhimbshme sa e Peshkopisë, Pogradecit dhe derbit.
