Drejtori i Transportit në Sarandë akuzohet si anëtar i bandës kriminale të trafikut të drogës
Klemend Balili, Drejtori i Drejtorisë Rajonale të Transportit në Sarandë, është shpallur në kërkim ndërkombëtar. Ai akuzohet si pjestar i një bandë të madhe kriminale të trafikut të drogës. Ai është shpallur dje në kërkim pas një operacioni të gjerë ndërkombëtar kundër trafikut të drogës. Aksioni u ndërmor në Greqi pak ditë më parë me arrestimin e 15 personave dhe shpalljen në kërkim të shumë të tjerëve. Të gjithë dyshohen të përfshirë në një rrjet të fuqishëm të trafikut të narkotikëve me përfitime qindra milionë euro.
Gjatë ditës së sotme është shpallur në kërkim edhe shqiptari Kelemnd Balili si dhe dy shqiptarë, Petro Dalanaj dhe Kleanth Palaj, roli i të cilëve mbetet i panjohur në këtë trafik. “Për transportin e lëndës narkotike (kanabis të papërpunuar) nga Shqipëria në Greqi dhe Evropën Lindore, Balili kishte rolin e sponsorit dhe të organizatorit dhe drejtonte transportin në sasi shumë të mëdha me rrugë tokësore me kamionë të mëdha dhe nga deti me skafe. Krahu i tij i djathtë që merrej me transportin dhe magazinimin nga Greqia e tutje ishte Alifandi Georgio”, thuhet në dokumentin e policisë greke, cituar nga BIRN.
Aksioni i gjerë policor ka nisur pas më shumë se një viti hetimesh në Greqi dhe vende të tjera ku në shënjestër ishte një grup i madh që merrej me trafikun ndërkombëtar të drogës. Operacioni masiv nisi me sekuestrimin e një sasie prej 678 kilogramësh marijuanë në një ishull në veri të Greqisë.
Droga e ardhur nga Shqipëria me skaf po transportohej nga organizata. Pasi dërgohej në Greqi, droga shpërndahej me autobusë të një agjencie udhëtimi për në vende të tjera të Evropës. Akuzat kanë shpërthyer gjatë ditës së sotme edhe në Shqipëri. Opozita e denoncoi publikisht Balilin si të përfshirë në këtë rrjet trafiku.
“Klemend Balilaj njihet për lidhjet e tij të forta politike dhe ka qenë sponsorizues i fushatës elektorale të PS në vitin 2013. Si lidhje të tij të drejtpërdrejta rezultojnë kushërinjtë e ministrit të Brendshëm, vëllezërit Habilaj, me të cilët ka bashkëpunuar për trafikim të lëndëve narkotike në vitet 2014-2016. Nëpërmjet vëllezërve Habilaj, Klemend Balilaj ka vendosur kontakt të drejtpërdrejt me ministrin e Brendshëm Saimir Tahiri”, tha Arben Ristani gjatë ditës së sotme.
Ndërsa vetë Balili i cilësoi politike akuzat e ngritura, duke theksuar se do të depozitonte kallëzim në gjykatë për shpifje. “Skam lidhje me shpifjet e opozitës. Çdo gjë është politike. Unë kam dëshmi penaliteti të pastër.Kjo situatë duhet të marrë fund një herë e mirë. Çdo kush që përbalt emrin tim do ta çojë në gjykatë për shpifje”, tha Balili publikisht.
