Pas 21 vitesh nga vdekja e shqiptarit Bajram Muça në spitalin e Chiarit në Itali, Gjykata e Breshias ka vendosur të rihapë dosjen e vdekjes së tij.
Sipas mediave italiane, Muça jetonte në Chiari, ndërsa në 4 shtator të vitit 1999 u dërgua me urgjencë në spitalin e Chiarit, pas një sherri të ndodhur me disa persona të tjerë.
Në spital kaloi në gjendje kome dhe më pas humbi jetën, ndërsa nga autopsia doli se shkaku i vdekjes së tij ishte sëmundja e meningjitit.
Por kur çështjen e mori një prokuror tjetër, u zbulua se shkaku i vdekjes nuk ishte meningjiti, por dhuna e ushtruar nga personat që donin ta grabisnin.
I akuzuar për vrasjen e Muçës është 41 vjeçari Lulzim Rubjeca, të cilin Gjykata vendosi ta dërgojë në burg, ndërsa gjyqi do të hapet në 29 shtator të këtij viti.
