Emergjencat Civile: Përmbytjet e janarit shkaktuan 9 milion euro dëme
Drejtoria e Emergjencave Civile, në bashkëpunim me institucionet ndërkombëtare, llogarit një kosto prej 35 milionë eurosh në vit që i krijohet vendit nga fatkeqësitë natyrore. Vetëm fatura paraprake e reshjeve të ditëve të para të janarit 2016 llogaritet të ketë qenë 9 milionë euro. Që nga viti 2009, ku përmbytjet kanë vijuar me intensitet të lartë, dëmi në total në vlera neto i krijuar deri në fund të 2015-s përllogaritet të jetë mbi 200 milionë euro.
Përmbytja e kulturave bujqësore, mbytja e të imtave dhe shpendëve të blegtorisë, shembja e rrugëve dhe urave, dëmi i krijuar në banesa janë pjesa më e madhe e kostove të krijuara në ekonominë e përgjithshme të vendit. Por fatura është padyshuim më e lartë për shkat të pamundësisë për të përfshirë në të kostot sociale, sëmundjet apo vdekshmërinë që mund të jenë në rritje në zonat që përjetojnë këtë fatkeqësi natyrore.
Emergjencat Civile, deklarojnë se është gati projekt-strategjia për minimizimin e rreziqeve që vijnë nga katastrofat natyrore, dhe se së shpejti ajo do të kalojë në qeveri. Ajo parashikon orientimin e fondeve buxhetore dhe investimeve publike e të donatorëve për të zbutur rrezikun e përmbytjeve në zonat më të rriskuara.
Por deri më tani pak është bërë. Gjatë rishikimit të buxhetit 2015, në korrik të vitit që shkoi, qeveria shkurtoi në më shumë se 25 për qind fondet për ujitjen dhe kullimin. Ndërsa banorët në zonën e Shkodrës ende nuk kanë përfituar kompensimet e vitit 2009.
