Krahasimi: Pagat e larta taksohen dyfish më shumë se rajoni
Jo vetëm bizneset por edhe individët në Shqipëri taksohen më shumë se kudo në rajon. Taksimi progresiv godet sidomos personat me të ardhura të larta. Në shumicën e vendeve të rajonit taksimi për pagat është 10 për qind, ndërsa në vendin tonë norma progresive shkon në 23 për qind. Në një matricë të Këshillit të Investimeve “zbulohet” se Shqipëria mban rekord për taksimin e individëve, sidomos atyre me paga të larta.
Norma progresive prej 23 për qind, për paga mbi 930 euro, është unike në gjithë rajonin. Për krahasim, në Malin e Zi, pagat e larta që quhen ata mbi 720 euro tatohen 11 për qind, poshtë tyre taksimi është vetëm 9 për qind. Madje në këtë shtet, pagat për punonjësit start up janë subjekt i përjashtimit nga taksimi për 8 vjet, deri në një shumë totale prej 200,000 euro. Serbia, që i ka taksat mbi biznesin të krahasueshme me ne, të ardhurat nga punësimi dhe të ardhurat nga biznesi i taton me 10 për qind. Në Maqedoni, tatimi mbi të ardhurat personale është i sheshtë prej 10 për qind. Po kështu edhe në Bosnjë. Ndëkohë Kosova edhe pse me taksim progresiv, është vendi me tatimin më të ulët mbi mbi pagën në rajon, me një shkallë nga zero në 10 për qind.
