Është mbajtur sot seanca në Gjykatën e Posaçme për komunikimim e masës së pezullimit nga detyra për ish-anëtarin e KPA Luan Daci.
Gjyqtari Luan Daci u pezullua nga SPAK me argumentin se ka kryer falsifikim dokumentesh, por sipas avokatëve të tij, pezullimi do duhet të bëhet vetëm me vendim të Gjykatës Kushtetuese.
Gjykata ka lënë në fuqi vendimin për pezullimin nga detyra, ndërkohë që dy avokatët theksuan se për Dacin nuk ka asnjë vepër penale.
“Janë një dyzim. Vendimi i Gjykatës ishte i marrë. Ne kemi parashtruar një dyzim se një gjyqtar që ka statusin e Gjykatës Kushtetuese nuk mund të pezullohet. Masa për të cilën ai është larguar nga puna është shuar me disa ligje më parë. Nuk ekziton dhe nuk ka asnjë vepër penale. Nuk ka asnjë masë në fuqi. Të lexojnë kushtetutën ato që japin masën. Lexojeni aty do të gjeni kriteret. Ne do ta ankimojmë vendimin.”- tha avokati Jordan Daci.
Anëtari i KPA-së, Daci u pezullua me vendim gjykate pasi kishte fshehur shkarkimin në vitin 1997, gjyqtare është Danjela Shirka. Daci i cili ka pasur në dorë dhjetra çështje gjyqtarësh dhe prokurorësh, duket se ka pasur dhe vetë probleme të shumta me dokumentet e tij, dhe për këtë ka nisur një hetim ndaj tij nga SPAK.
Njoftimi i plotë i SPAK-ut lidhur me nisjen e hetimeve: Prokuroria e Posaçme kundër Korrupsionit dhe Krimit të Organizuar Tiranë, ka rregjistruar proçedimin penal Nr.56, viti 2020 për veprën penale ″Falsifikimi i dokumenteve″, të parashikuar nga neni 186, paragrafi (1) i Kodit Penal.
Nga veprimet hetimore të kryera lidhur me këtë proçedim penal është provuar se shtetasi Luan Daci, me funksion Gjyqtar në Kolegjin e Posaçëm të Apelimit, në aplikimin e kryer prej tij në datën 03.02.2017 për t’u emëruar në funksionin e mësipërm, ka paraqitur rrethana të rreme, duke mos deklaruar faktin se ndaj tij është marrë më parë masa disiplinore ″largim nga puna″.
Shtetasi Luan Daci në vitet 1994-1997 ka ushtruar funksionin e Gjyqtarit në Gjykatën e Rrethit Gjyqësor Tiranë. Këshilli i Lartë i Drejtësisë, pas propozimit të Ministrit të Drejtësisë, me vendimin Nr.6, datë 24.12.1997, në nenin 1 të tij, ka vendosur: ″Z.Luan Daci, largohet nga detyra e gjyqtarit për shkelje të ligjës dhe paaftësi në detyrë″.
Në bazë të nenit 6, paragrafi (1), gërma (dh) të ligjit Nr.84/2016 ″Për rivlerësimin kalimtar të gjyqtarëve dhe prokurorëve në Republikën e Shqipërisë″, si dhe nenit 150, paragrafi (3) të ligjit Nr.96/2016 ″Për statusin e gjyqtarëve dhe prokurorëve në Republikën e Shqipërisë″, i cili ka qënë në fuqi në momentin e aplikimit, ekzistenca e masës disiplinore ″largim nga puna″ përbënte shkak ligjor që shtetasi Luan Daci të mos plotësonte kriteret formale për të aplikuar në pozicionin vakant Gjyqtar në Kolegjin e Posaçëm të Apelimit.
Në rrethanat e mësipërme, shtetasi Luan Daci është marrë në përgjegjësi penale nga Prokuroria e Posaçme për kryerjen e veprës penale ″Falsifikimi i dokumenteve″, të parashikuar nga neni neni 186, paragrafi (1) i Kodit Penal.
Me kërkesë të Prokurorisë së Posaçme, Gjykata e Posaçme e Shkallës së Parë për Korrupsionin dhe Krimin e Organizuar, me vendimin Nr.54, datë 20.05.2020 ka vendosur ndaj shtetasit Luan Daci caktimin e masës së sigurimit ndaluese ″pezullimi i ushtrimit të një detyre a shërbimi publik″, të parashikuar nga neni 242 i Kodit të Proçedurës Penale, duke e pezulluar nga atë funksioni Gjyqtar në Kolegjin e Posaçëm të Apelimit.
