Ditën e sotme u zhvillua mbledhja e Konferencës së Kryetarëve me anë të mjetit të komunikimit elektronik (Cisco Ëebex).
Mbledhja shqyrtoi, diskutoi gjerësisht dhe miratoi programin e punës së Kuvendit për periudhën 25 maj-3 korrik 2020. Tre seancat e ardhshme të Kuvendit dhe deri në korrik do të zhvillohen nga 3 orë duke vijuar me masat dhe standartet për mos lejuar përhapjen e COVID-19.
Mbledhja miratoi me konsensus kalendarin e punimeve të Kuvendit për periudhën 25 maj-12 qershor 2020 dhe vendosi zhvillimin e seancave plenare në datat 28 maj, 4 qershor dhe 11 qershor 2020.
Në përfundim të mbledhjes, Kryetari i Kuvendit, Gramoz Ruçi, tërhoqi vëmendjen se “Funksionaliteti i Kuvendit të Shqipërisë është në vijë të parë krahasuar me parlamentet e vendeve të BE-së. Kuvendi duhet të japë shembullin dhe mesazhe te qarta për publikun për mbrojtjen nga pandemia. Përgëzoj kryetarët e komisioneve për hapësirat e krijuara për të gjithë anëtarët për të diskutuar e marrë vendime. Veprimtaria e Kuvendit ka qenë transparente si asnjëherë tjeger, edhe pse në kushte pandemie. Aksesi për mediat për transmetimin e mbledhjeve të komisioneve dhe seancave plenare ka qenë i plotë. Komisionet të përshpejtojnë punën dhe brenda qershorit të gjitha institucionet e pavarura të raportojnë në Kuvend dhe të miratohen rezolutat përkatëse mbi verimtarinë e tyre.”
