ODA: Në 2016 do të paguajmë mesatarisht 375 986 lekë për person
Periudha kohore ndërmjet 2010 e 2016 mund të cilësohet si koha e rritjes galopante të borxhit publik të vendit. Sipas të dhënave të Open Data Albania i ndarë në treguesin për frymë borxhi i Shqipërisë është rritur nga 2.4 milionë lekë të vjetra në 3.7 milionë lekë të vjetra për person, duke e patur këtë kulm në 2016-n. E detajuar shifra është 245 151 lekë borxh publik stok për çdo qytetar në vitin 2010, për të shkuar në 375 986 lekë me një rritje mbi 53 për qind në vitin 2016. Vetëm në vitin 2015 borxhi është rritur me 6.66%. Në 2016-n parashikohet të merren edhe 42 miliardë lekë të tjera borxhe. Kjo ka rritur ndjeshëm edhe shërbimin e borxhit për frymë. Ky tregues nënkupton vetëm interesat që paguhen në vit për borxhin e marrë.
Ndonëse në 2014 dhe 2015 pati një përmirësim relativ në pagesat e borxhit për shkak të rënies së normave të interesit të tregut të brendshëm por edhe të një kursi të favorshëm në këmbimin e lekut me euron, në vitin 2016, kostoja e borxhit për frymë rritet mbi 11 përqind. Kjo sepse interesat sa vijnë e shtohen. Edhe pse Ministria e Financave parashikon ulje të stokut të borxhit, niveli i interesave për atë që është marrë në vite, për 2016 ka shkuar në 43 miliardë lekë.
