Nga Erges Eskiu
Ata të shohin në sy, çuditshëm, të ngrirë, nuk lëvizin, as qepallat e syve nuk lëvizin. Ata po mpihen. Unë i shoh i habitur, ndjej keqardhje… Ata jane bërë të pandjeshëm… më shpejt se tek ty, më shpejt se tek mua.
Skamja i ka zhveshur ata nga emocionet, i ka zhveshur nga mendimet, po u err sytë, po i zhyt ne errësirë. Ajo ka tronditur rëndë psikikën e tyre.
Qytetarët kanë nevojë për para, të pinë ujë, të hanë bukë! Kanë nevojë të ngrohen dhe kanë nevojë për siguri për të sotmen, për të nesërmen.
Qeveria e ka për detyrë ta bëjë!
Qeveria ka për detyrë t’i ndihmojë!
Situata po bëhet e frikshme.
Nuk ekzagjeroj aspak, por vetëm 200 metra larg qendrës së Beratit, njerëzit kanë filluar qysh tani të duken si të vdekur që ecin.
Me gjasë, ata do fillojnë “të hanë” njëri-tjetrin, nëse qeveria nuk reflekton, të lërë mënjanë sulmet politike, të marrë planin e opozitës e ta vendosë në zbatim.
Pasiguria e çdo qytetari është në rritje.
Ka të ngjarë që nesër do të rinisin vjedhjet, grabitjet dhe vrasjet. Nëse kjo ndodh, faji nuk është i qytetarëve, të cilët i kthehen instikteve kafshërore, por është përgjegjësi drejtpërdrejtë e shtetit që po i lë në mëshirë të fatit!
“Qëndro në shtëpi!”, por shteti duhet të të garantojë minimumin jetik! Uria po kërcënon frikshëm shoqërinë shqiptare!
