Në 24 orë Kosova gëzon me një tjetër lajm të mirë. Pas pranimit në UEFA vjen lajmi i shumëpritur për liberalizimkin e vizave. Komisioni Evropian i propozoi sot Këshillit të Bashkimit Evropian dhe Parlamentit Evropian, heqjen e vizave për qytetarët e Kosovës dhe vënien e Kosovës në listën e vendeve me qarkullim të lirë. Ministri i Integrimit Europian në Kosovë, Bekim Çollaku, ka konfirmuar se brenda këtij viti, qytetarët e Kosovës do të nisin udhëtimin pa viza në zonën “Schengen”.
Komisioneri për Migrim dhe Çështje të Brendshme, Dimitris Avramopoulos tha se Kosova ka përmbushur të gjitha kriteret e kërkuara nga udhëzuesi për liberalizim të vizave dhe se shpreson se tani edhe Parlamenti Evropian dhe Këshilli, do ta miratojnë propozimin.
“Ne e propozojmë liberalizimin e vizave për Kosovën. E kjo ka të bëjë dhe me ratifikimin marrëveshjes me malin e zi dhe korrupsionin para se vendimi të hyjë në fuqi. Kjo është rezultat i Kosovës dhe punës së madhe në arritjen e kritereve. Ne do ta monitorojmë këtë proces nga afër. E dimë sa e rëndësishme është për qytetaret dhe jam shumë i lumtur që rekomandoj heqjen e vizave për Kosovën. Heqja e vizave, nuk do të thotë hyrje e lirë dhe e pakontrolluar e kosovarëve në BE. KE kemi të bëjmë me kontrollin e migrimit ilegal. Sot kemi marrë hapa konkret për Turqinë dhe Kosovën”, tha ai.
Lajmi u përshendet menjëherë në një konferencë për mediat nga kreu i Kuvendit Kadri Veseli. “Falënderoj ish-kryeministrin dhe ministrat që kanë bërë punë të jashtëzakonshme. Kjo është epoke e re, jemi në fund të izolimit të kosovarëve, është si rrëzimi i murit të Berlinit”.
Qytetarët e Kosovës ishin të izoluar nga lëvizja në Shengen, të cilën e gëzonin shumë vende të tjera që nuk janë anatëre në Bashkimin Europian, si Shqipëria dhe vendet fqinje.
