Nga Aleksandër Biberaj
29-VJETORI E RIVENDOSJES SË MARDHËNIEVE DIPLOMATIKE SHBA-SHQIPËRI NGJARJE E SHËNUAR! SHBA PARTNERI KRYESOR STRATEGJIK I SHQIPËRISË! FUQIZIMI I VAZHDUESHËM I KËTYRE MARDHËNIEVE PRIORITET KOMBËTAR!
Të dashur miq,
29 vite më parë, vetëm 3 muaj pas Lëvizjes Studentore të Dhjetorit dhe themelimit të Partisë Demokratike, u rivendosën mardhëniet diplomatike ndërmjet SHBA-së dhe Shqipërisë. Këtë ngjarje të shënuar na e kanë kujtuar Drejtori për Euro-Azinë i Radios Zëri i Amerikës Z. Elez Biberaj si dhe Ambasadorja Amerikane në Tiranë Yuri Kim me statuset e tyre respektive në Facebook dhe Twitter. Mardhëniet diplomatike me SHBA-në u ndërprenë nga regjimi komunist i Enver Hoxhës pas marrjes së pushtetit me dhunë në vitin 1944. Rivendosja e këtyre mardhënieve ishte një ndër prioritetet kryesore të politikës së jashme të PD-së, e shpallur kjo që në formimin e saj në mitingun themelues me 12 Dhjetor 1990 në Qytetin Studenti. SHBA ka qenë mbështetësi kryesor i reformave dhe zhvillimeve demokratike në Shqipëri gjatë këtyre 30 viteve për fuqizimin dhe konsolidimin e demokracisë, për shtetin e së drejtës si dhe për liritë dhe të drejtat themelore të njeriut. SHBA dhe Presidenti Bush ishin mbështetësit kryesore për anëtarësimin e Shqipërisë në NATO në vitin 2009. SHBA ishte faktori kryesor për çlirimin e Kosovës, shpalljen e pavarësisë dhe njohjen ndërkombëtare nga rreth 115 vende, pavarësi që u ratifikua edhe nga Gjykata Ndërkombëtare e Drejtësisë. SHBA ka qënë dhe mbetet partneri kryesor strategjik i Shqipërisë dhe fuqizimi i këtij partneriteti mbetet prioritet kombëtar!
