Kryeministri Rama Mblodhi pasditen e sotme kryesinë e re të Partisë Socialiste e zgjedhur në mbledhjen e fundit të Asamblesë Kombëtare të kësaj partie. Objektivi i kryesisë së re të PS tha Rama, është fitorja në zgjedhjet parlamentare të 2017. Kryeministri Rama bëri një përmbledhje të arritjeve të reformave gjatë qeverisjes dhe vuri theksin tek reforma në drejtësi. Ai tha se loja e PD me alibi apo justifikime për reformën në drejtësi nuk do të vazhdojë pafund.
“Ka ardhur koha që ta shtyjmë përpara procesin dhe unë besoj se pala jonë në komision duhet të këmbëngulë që procesi most ë rrijë më në vend dhe palët të ballafaqohen me të vërtetën. Loja që PD ka organizuar me alibi, justifikime dhe propagandë, kush e do dhe kush nuk e do reformën nuk mund të vazhdojë pa fund. Ka ardhur momenti që të gjitha palët të ballafaqohen më të vërtetën. Nuk kemi të bëjmë më Kodin e Da Vincit, por kemi të bëjmë me një dokument që është parë thelbësisht nga Komisioni i Venecias dhe është momenti për ta shtyrë përpara dhe për ti ballafaqur të gjithë me publikun. Besoj se mbi këtë bazë është e qartë dhe puna e kësaj kryesie që është një punë sa politike aq edhe organizative, sa udhëheqëse dhe zbatuese, sa për ti paraprirë të gjitha proceseve aq edhe për të kurruar në detaj cdo problem dhe cdo shqetësim deri për socialistin më të ri”, tha Rama.
