QKB: kërkesat për çregjistrim biznesi u rritën 60 për qind
Paqëndrueshmëria e biznesit është një tjetër tregues i vështirësisë që sipërmarrjet po gjejnë për të operuar në treg. Gjatë katër muajve të parë të vitit janë çregjistruar në QKB 2530 biznese, me një rritje prej 60 për qind në krahasim me të njëjtën periudhë të një viti më parë. Ritmi më i lartë i çregjistrimeve ishte sidomos në janar dhe në mars, me një rritje përkatësisht prej 81 dhe 277 për qind.
Në kahun tjetër, regjistrimi i bizneseve vijon në rritje, i nxitur nga tendenca e sipërmarrjeve për të ndarë aktivitetin, në mënyrë që të mos kalojnë kufirin e biznesit të vogël. Sipas të dhënave zyrtare të QKB-së në total në periudhën janar – prill 2016 u regjistruan mbi 8, 100 biznese ose rreth 19 për qind më shumë se e katërmujori i vitit 2015.
Vetëm pak ditë më parë ishte Shoqata e Mbrojtjes së Tregtarëve e cila dha alarmin për gjendjen e vështirë në të cilën ndodhet biznesi, kryesisht ai i mesëm dhe i vogël dhe ku u kërkua marrja e masave urgjente nga ana e qeverisë, siç është ajo e rishikimit të barrës fiskale.
