Nga të dhënat e Ministrisë së Financave rezulton 10 milionë euro shtesa nga taksat dhe kostot e fshehta mbi 30 milion euro
Rritja e taksave për biznesin do të rëndojë mbi konsumatorin. Ministria e Financave, sqaron përmes të dhënave në “Buxheti për qytetarët 2016”, se gjatë vitit 2016 barra e taksave për biznesin është rritur me 10 milionë euro. Por pagesat e tjera si skanimi në dogana, licensimet për karburantet dhe mbipagesat e energjisë e shtojnë barrën edhe me 30 milion euro. Këto janë kosto që biznesi në fund të ditës ia faturon konsumatorit final. Në vitin 2016-n, nuk pritet të ketë ndryshime të mëdha të taksave direkte. Por as ky vit nuk do të jetë i imunizuar nga kostot shtesë që do të shkaktojë sistemi fiskal.
Kompanitë edhe këtë vit do të jenë të shtrënguara të paguajnë më shumë tarifa indirekte që do të shtojë ndjeshëm koston e produkteve apo shërbimeve të tyre. Është e pamundur të bëhet një përllogaritje e totalit të tarifave të të fshehura megjithatë dihet me siguri se vetëm nga koncesioni i skanimit në dogana bizneset do paguajnë këtë vit rreth 9 milionë euro plus. Po ashtu tregtarët e naftës do paguajnë 10-30 milionë euro në tarifa rilicencimi pas disa muajsh. Ndërkohë kompanitë që po përballen me mbifaturime të energjisë, për pagesa në tensionin e ulët për shkak të rritjes së tarifës 27% do kenë një faturë shtesë mbi 16 milionë euro.
