Dy vjet pasi e kishin pushtuar Shqipërinë, italianët nisën një program të madh ndërtimi në Tiranë. Në një kino-kronikë të Studio Luce të 27 nëntorit 1941, jepen pamjet e ndërtimeve në pjesën jugore të Bulevardit të Tiranës.
Në proces ndërtimi në atë kohë kanë qenë ish ndërtesa e oficerëve, që është Kryeministria e sotme, selia e Partisë Fashiste që sot është Korpusi Qendror Universitar, ndërtesa ku sot është dekanati i Universitetit të Tiranës, si edhe stadiumi që në atë kohë ishte projektuar të kishte një kapacitet prej 15 mijë vendesh.
Plot 75 vjet më vonë, njëri prej këtyre ndërtimeve, e pikërisht stadiumi që sot mban emrin “Qemal Stafa”, planifikohet të prishet për të ndërtuar në vend të tij po një stadium por me një arkitekturë krejt tjetër nga ajo që ndërtuan italianët.
