Në kuadër të Operacionit Forca e Ligjit, policia ka sekuestruar edhe automjetin e blinduar të Landi Muharremit, i njohur ndryshe edhe si Rrumi i Sukthit.
Mësohet se ky i fundit ishte në makinë me prokurorin Arjan Ndoj ditën që iu bë atentat në hyrje të Durrësit më datë 1 nëntor, ku mbeti i vrarë Andi Maloku.
Në shtator të vitit 2016 ai u shpall në kërkim nga policia për rrahjen e biznesmenit libanez Faadi Mitri në sy të gruas dhe vajzës së tij. Biznesmeni u dhunua nga tre persona, njëri prej të cilëve Skënder Kraja, Landi Muharremi dhe kushëriri i tij.
Muharremi kishte pretendime mbi pronësinë e sipërfaqes së zonës turistike në zonën e Gjirit të Lalzit ku pritej që të investonte biznesmeni libanez me ndërtimin e një kompleksi, i cili pas dhunimit me shkop bejzbolli u largua nga Shqipëria.
