Interesi mesatar i depozitave në lekë në mars poshtë 1 për qindëshit
Të mbash paratë në bankë do të thotë thjeshtë ti ruash se për përfitim prej tyre as që bëhet fjalë. Me interes poshtë 1 për qindëshit, realisht për depozitat bankare vetëm se ushqehen bankat ndërsa mbajtësit e tyre në fund të vitit dalin me humbje. Sipas statistikave të Bankës së Shqipërisë, interesi mesatar i depozitave në lekë, për herë të parë në histori, për të gjitha afatet e maturimit zbriti në muajin mars poshtë 1 për qindëshit. Drastike është rënia e interesave për depozita një dhe tre mujore të cilat japin një kthim shumë më afër zeros. Rënie të ndjeshme ka patur edhe interesi i depozitave me afat më të gjatë se një vit.
Që prej shtatorit 2011, kur Banka e Shqipërisë filloi politikën agresive të lehtësimit monetar, duke orientuar bankat të ulin interesat e depozitave e kredive, përfitimi nga depozitat është ulur ndjeshëm. Kjo rënie e interesave ka bërë që depozituesit të tërheqin paratë nga kursimet 1 vjeçare, duke i zhvendosur ato drejt alternativave të tjera si letra me vlerë, fonde investimesh, apo kursime afatgjata. Edhe në mars, depozitat me afat të individëve në lekë ranë me 1.7 miliardë lekë, ndërsa me bazë vjetore janë tkurrur me 10 për qind.
Në përpjekje për të nxitur ekonominë, Banka e Shqipërisë ka ulur 14 herë normën bazë 6 vitet e fundit, duke e çuar aktualisht në 1.5 për qind.
