Pas sulmit për herë të dytë të makinës së tij, ka reaguar analisti Fatos Lubonja.
Ngjarja ndodhi gjatë natës dhe ishte e ngjashme me herën e parë. Person i paidentifikuar e ka qëlluar me sende të forta makinën e analistit të parkuar pranë banesës së tij, duke shkaktuar dëme të automjetit.
Lubonja tha se dyshon që akti është kryer për shkak të qëndrimeve që ai mban ndaj politikës, dhe sipas tij kanë patur ndikim edhe deklaratat e kryeministrit Edi Rama, i cili i quan analistët qenër.
“Duket e qëllimtë se nuk kishte ndonjë vjedhje ndonjë gjë. Nuk ishin hapur dyert aty. Një akt vandal them unë, ndonjë urrejtje. Nuk është ai person me probleme mendore, ai është i arrestuar. I mbetet policisë, prokurorisë të hetojë. Por unë nuk është se kam probleme personale me njerëz. Ndaj unë mendoj që është për urrejtje për qëndrimet që unë mbaj. Janë edhe deklaratat e kryeministrit që sheh qentë dhe thotë shkoni ndiqeni atë analistin. Këto deklarata nxitin urrejtje. Këto janë forma vandale që të kthejnë pas”, u shpreh Lubonja.
