Dëshmitarët që nuk do të paraqiten me vullnetin e tyre për të dëshmuar në Komisionin Hetimor për privatizimin e OSSH-së do të shoqërohen forcërisht.
Paralajmërimi u bë nga kreu i Komisonit, Taulant Balla, në mbledhjen e dytë të komisionit, ku u miratua plani i hetimit dhe rregullorja.
“Unë nuk besoj që dëshmitari Sali Berisha do të vijë të dëshmojë, por do të bëjë si gjithmonë duke shmangur hetimet”, tha deputeti Pjerin Ndreu.
“Komisioni punon sipas Kushtetutës dhe thirrja e dëshmitarëve bëhet me një vendim të ndërmjetëm. Pra, nëse ne do të vendosim me vendim të ndërmjetëm që të thërrasim dëshmitarët forcërisht atëherë do të zbatohet ligji dhe vendimi”, iu pergjigj Balla.
Në programin hetimor të këtij Komisioni është parashikuar thërritja për të dëshmuar e të gjithë aktorëve të privatizimit të qeverisë së shkuar, mes të cilëve edhe Sali Berisha.
“Sipas kalendarit, në 15 maj, ish-kryeministri Sali Berisha dhe ish ministrat e tij do të dëshmojnë në këtë komision për të dhënë shpjegime lidhur me marrëveshjen e privatizimit”, vijoi Balla.
Balla njoftoi edhe ndryshimin e përbërjes së Komisionit. Sipas tij, Ridvan Bode e Sherefedin Shehu janë objekt i hetimit të Komisionit dhe nuk mund të jenë anëtarë të tij.
“Sherefedin Shehu e Ridvan Bode janë në konflikt interesi me objektin e hetimit të këtij komisioni për shkak se për detyrat që kanë mbajtur njëri ministër dhe tjetri zëvendësministër gjatë kohës që është negociuar marrëveshja, ne do t’i kërkojmë Kuvendit që t’i zëvendësojë këta dy anëtarë. Është e papranueshme që dy persona të cilët janë objekt i hetimit, të jenë anëtar të këtij komisioni”, tha Balla.
