Pas lajmit të hidhur të ndarjes nga jeta të aktores së mirënjohur shqiptare Marika Kallamata, ka reaguar edhe presidenti i vendit Ilir Meta.
Përmes një mesazhi të shpërndarë në rrjetet sociale, kreu i shtetit shprehet se, kjo është një humbje e pazëvendësueshme për teatrin dhe kinematografinë shqiptare.
Në fund të mesazhit të tij, presidenti u shpreh ngushëllimet familjarëve, bashkëpunëtorëve të aktores por edhe të gjithë artdashësve shqiptarë.
“Ndarja nga jeta e artistes së shquar dhe të dashur Marika Kallamata, është një humbje e pazëvendësueshme për teatrin dhe kinematografinë shqiptare!
Trashëgimia e pasur artistike, galeria e roleve të interpretuara me mjeshtëri të rrallë dhe të gjitha kujtimet që na la pas, nderohen me respekt dhe do të mbahen mend gjithmonë.
Duke ndarë dhimbjen, u përcjell ngushëllimet më të sinqerta të afërmve dhe bashkëpunëtorëve të saj, si edhe të gjithë artdashësve shqiptarë!”, shprehet presidenti Meta.
