Kreu i Partisë Demokratike Lulzim Basha ka inspektuar sot banesat e dëmtuara nga tërmeti në Manëz.
Në një postim në rrjetet sociale, Basha i bën thirrje qeverisë të marrë masa urgjente pasi situata po rëndohet për shkak të motit të keq.
Basha rithekson thirrjen e tij drejtuar kryeministrit Edi Rama që të anulojë dhënien e 150 milion dollarëve të parashikuara në buxhet për koncesione dhe t’i kalojë në funksion të rindërtimit pas tërmetit shkatërrimtar të 26 nëntorit.
Reagimi i plotë i Bashës:
Gjendja po rëndohet për shkak të motit. URGJENTE marrja e masave për strehim dhe alokimi i fondeve për rindërtim.
5 pallate me nga 25 familje në Manëz janë të pabanueshme. Banorët po nxjerrin orenditë për tu zhvendosur tek të afërmit në pamundësi të një strehe. Të tjerë që janë strehuar në çadra janë në kushte shumë të vështira edhe për shkak të motit me shi dhe të ftohtit. Ata thonë që u kanë ardhur në ndihmë vetëm shoqatat ndersa denoncojnë abuzime në mënyrën e trajtimit të qytetarëve.
Çdo ditë që kalon, bëhet më e vështirë për këta banorë që me fëmijë të vegjël prej ditësh jetojnë në çadra. Të tjerë jetojnë në makina dhe ankohen se askush nuk ka ardhur të vlerësojë gjendjen e banesave të tyre.
Është e domosdoshme të angazhohen sa më shumë inxhinierë e specialistë. 500 inxhinierë janë të gatshëm të kontribuojne vullnetarisht, mjafton që qeveria ti angazhojë.
Paratë që shkojnë tek 10 oligarkë duhet të shkojnë tek mijëra qytetarë që kanë mbetur në mes të katër rrugëve, pa strehë dhe pa ushqim. Me 150 milion dollarë që marrin 10 oligarkë mund të rindërtohet pjesa dërrmuese e objekteve të banimit të shkatërruar nga tërmeti.
Duhet ndërhyrje e menjëhershme që të lehtësojmë vuajtjet dhe dhimbjen e mijëra familjeve.
https://www.facebook.com/lulzimbasha.al/posts/2794566097261220
