Mbrëmjen e djeshme dy makina të parkuara në afërsi të Kishës Françeskane në Shkodër janë shkrumbuar nga flakët.
Ka qenë ora 23:48 e mbrëmjes së të dielës kur dy persona me skafandër në kokë dhe me një motor janë afruar tek mjeti tip benz i gjyqtarit Andri Ymeri duke e lyer me lëndë djegëse dhe duke i vënë flakën mjetit që ndodhej i parkuar afër kishës françeskane në Shkodër.
Menjëherë flaka është përhapur me shpejtësi duke shkrumbuar mjetin tip benz të gjyqtarit Ymeri dhe nje tjetër ngjitur me të.
Dy autorët pasi sigurohen në pak sekonda se mjeti mori flakë dhe po digjej janë larguar me shpejtësi.
Autorët në videon e siguruar nga policia prej bizneseve përreth shihen duke u afruar dhe duke e lyer mjetin me benzinë e më pas duke i vënë flakën.
Menjëherë pas zjarrit të përhapur me shpejtësi janë lajmëruar efektivët zjarrfikës të cilët kanë mbërritur në vendngjarje duke tentuar të shuajnë flakët. Të dy mjetet janë shkrumbuar plotësisht në të gjitha pjesët
Ndërkohë policia ka nisur hetimet për këtë ngjarje të ndodhur për të identifikuar autorët e më pas për të bërë të mundur kapjen e tyre.
