Ish-deputeti demokrat Klevis Balliu ka bërë publike dokumentin që projekti korrupti i Unazës së Re, që po shkatërron shtëpitë e qindra familjeve për vjedhjen e qindra milionë eurove dhe ndërtimin e disa komplekseve me pallate në të njëjtin vend është pa një leje të vlefshme ndërtimore.
PD ka publikuar dokumenta dhe të dhëna duke pretenduar se projekti i Unazës së Re u nis si një projekt për të vjedhur, duke shkelur disa nga rregullat kryesore për ndërtimin e një vepre të tillë.
“Roli kyç në skemën e vjedhjes në projektin e Unazës së Re ka agjencia e Rrugëve, që në kundërshtim me ligjin e sponsorimeve ka pranuar si dhuratë një projekt të gatshëm mbi 1 milionë euro nga AVE Consulting. Një dokument tjetër tregon se kjo kompani nuk ka drejtues teknik në fushën e gjeodisë. Ky është një fakt shtesë për mungesën e studimit topografik pa të cilin nuk mund të projektohen detajet e zbatimit të projektit. Mungesa e studimit sjell pasojat juridike në pavlefshmërinë e lejes së ndërtimit të projektit që kushton 20 milionë euro për 1 kilometër. Aksi i rrugës zhvendoset sipas interesave korruptive të momentit dhe rritet kostoja e punimeve. Përveç anës teknike, në këtë çështje ka dhe një konflikt të pastër interesi të kompanisë që ka dhuruar projektin. Nga njera anë AVE që ka projektin për shkatërrimin e qindra ndërtimeve, ka fituar tenderin për të mbyllur procedurat e legalizimeve informale”, është shprehur Balliu.
