Debate të ashpra ka pasur sot në mbledhjen që kryeministri Edi Rama ka pasur me koordinatorët politikë të bashkive të veriut të vendit.
Mësohet se Rama iu ka kërkuar llogari koordinatorëve të Shkodrës, që sipas tij nuk kanë mundur që ti japin dot drejtim situatave, pasi çdokush e mendon administratën si mundësi punësimi për të afërmit e tij.
Rama ka debatuar me deputetin Paulin Sterkaj, pasi ky i fundit është shprehur se drejtoritë janë kthyer në tendera, ku çdo deputet kërkon që të emërojë njerëzit e tij.
“E keni bërë si tender këtë çështje. Secili çon emrat e vet” mësohet të jetë shprehur deputeti socialist, ndaj të cilit kryeministri Rama ka reaguar ashpër, duke thënë se nga e hëna do të merret vetë me këtë çështje.
“Nuk e kemi bërë tender. Musai me ka thënë që i keni çuar nga 7 lista. Kam menduar që ju do ta zgjidhni këtë gje. Tani do merrem vetë. Meqe ju nuk i dhatë drejtim, të hënën do bëjmë mbledhje të posacme vetëm me Shkodrën për këtë çështje” – mësohet të jetë shprehur kryeministri Rama, në përgjigje ndaj deputetit Stërkaj.
