Dy vëllezër janë shpallur në kërkim nga autoritetet britanike pasi dyshohet të jenë vrasësit e 39 personave që u gjendën në pjesën frigoriferike të një kamioni.
Bëhet fjalë për dy vëllezërit nga Irlanda Veriore, Ronan Hughes, 40 vjeç, dhe Christopher, 34 vjeç të cilët akuzohen për vrasje dhe trafikim të njerëzve.
Shefi i policisë Stuart Hooper, tha se është thelbësore për hetimin gjetja e dy vëllezërve.
“Ne besojmë se ata janë në Irlandën Veriore por ata gjithashtu kanë lidhje me Republikën Irlandeze”, tha Hooper, duke shtuar se “kushdo që ka një informacion në lidhje me vendndodhjen e tyre, duhet që të telefonojë.”
Dje, shoferi i kamionit Maurice “Mo” Robinson u paraqit në gjykatë i akuzuar për vrasje dhe trafik njerëzish. Ai së bashku me dy vëllezërit akuzohen se janë pjesë e një “unaze globale” të kontrabandistëve të njerëzve.
