Gjykata e Shkallës së Parë në Shkodër, dha vendimin arrest me burg me afat 40 ditë për Marash Arra, i dyshuar si autor i vrasjes së kushëririt të tij Lazër Arra.
Ndërkohë, i dyshuar për vrasjen e 55-vjeçarit, nuk ka pranuar akuzat, duke mohuar kategorikisht se ka lidhje me ngjarjen.
Ngjarja në fjalë ndodhi të hënën në fshatin Shosh të Dukagjinit. 55-vjeçari Lazër Arra kishte shkuar në fshat për të mbledhur ushqimet e dimrit, por është ekzekutuar me armë zjarri. Ai është qëlluar për vdekje, teksa ka qenë duke transportuar me kuaj disa produkte ushqimore nga arat e fshatit drejt rrugës kryesore të makinave.
