Ministri i Jashtëm i Gjermanisë Heiko Maas e konsideroi të çmuar votën e parlamentit gjerman për hapjen e negociateve për Shqipërinë dhe Maqedoninë e Veriut.
Një ditë pas miratimit të shumicës së Bundestagut, shefi i diplomacisë gjermane theksoi se Ballkani Perëndimor është një rajon me rëndësi për BE-në.
Ai shprehet i bindur se qasja e kushtëzuar, e sugjeruar nga Bundestagu gjerman, do të bindë vendet e tjera në BE të bien dakord për fillimin e negociatave të pranimit.
“Të dy vendet duhet të vazhdojnë përpjekjet për të bërë përparime të mëtejshme në rrugën e pranimit në BE. Miratimi nga Bundestagu gjerman për fillimin e negociatave të pranimit me Shqipërinë dhe Maqedoninë e Veriut tregon një mesazh të rëndësishëm. Votimi thekson rëndësinë e Ballkanit Perëndimor për BE. Jemi të sigurt se qasja e kushtëzuar, e sugjeruar nga Bundestagu gjerman, do të bindë vendet e tjera në BE të bien dakord për fillimin e negociatave të pranimit”, u shpreh ministri Maas.
