Dyshohet se gjyqtarët kanë tjetërsuar pronësinë e godinës së ish-hotel Vollgës në Durrës
Dhurata Bilo, Vladimir Skënderi dhe Ndue Gjura janë tre gjyqtarë të gjykatës së shkallës së parë në Durrës që janë vënë nën hetim, pasi dyshohet se kanë shpërdoruar detyrën duke tjetërsuar pronësinë e godinës së ish-hotel Vollgës në Durrës.
Prokuroria e Durrësit ka filluar hetimin për veprën penale të “Fallsifikimit të dokumentave” pasi ka konstatuar një vendim të dyshimtë gjykate mbi këtë çështje. Ky është një proces që ka zgjatur për disa vite ku dy palë kanë pretenduar pronësinë mbi truallin dhe objektin. Konkretisht, Mohammmed Abdullah Bavazeri, përfaqësues i “Saudi Brother Commercial Company” dhe shtetasi Zanmir Hasa, janë përballur në gjykatë me pretendimet e tyre dhe çështja ka arritur deri në Gjykatën e Lartë.
Prokuroria e Durrësit ka konstatuar se, ndërkohë që po zhvillohej shqyrtimi gjyqësor në Gjykatën e Lartë, gjykata e Durrësit, për të njëjtin objekt, ka urdhëruar Hipotekën e Durrësit të regjistrojë si pronar në këtë pronë shtetasin Mohammed Abdullah Bavazer, duke fshirë nga regjistri hipotekor emrin Zanmir Hasa, i cili rezultonte deri në atë kohë si pronar.
Krahas hetimit të nisur tashmë, Prokuroria do të njoftojë Presidentin e Republikës dhe Këshillin e Lartë të Drejtësisë mbi dyshimet e saj për vendimmarrjen e tre gjyqtarëve të Gjykatës së Rrethit Gjyqësor Durrës
