Halimi: Urdhri politik i kryeministrit injoron me arrogancë rekomandimet e Venecias dhe kjo është dëshmi e vullnetit të keq për t’i ikur konsesusit
Partia Demokratike deklaroi sot se Edi Rama ka urdhëruar deputetët e tij të mos pranojnë kërkesën e opozitës për hartimin e një drafti të vetëm konsensual sipas Komisionit të Venecias për Reformën në Drejtësi. Deputeti demokrat Eduard Halimi theksoi përmes një deklarate për mediat se Rama nuk e pranon dot një konsensus sipas Venecias.
“Vendimi i sotëm i Ramës që dërgoi një draft të vetin, jo transparent, të pakonsultuar me askënd, të hartuar me urdhër politik, që injoron me arrogancë rekomandimet e Venecias, ishte dëshmi e vullnetit të keq për t’i ikur Venecias, për t’i ikur konsesusit sipas standardeve të Venecias.
Opozita tregoi edhe njëherë sot në komision, vullnetin e mirë për një reforme konsensuale bazuar në rekomandimet e Venecias, një reforme që bazohet ne standarde europiane që shmang çimentimin e kapjes politike sipas draftit të Ramës dhe që do shpjegohet pikë për pikë nga ekspertet e saj, në qëndrimin që do i dërgojë komisionit të Venecias”, tha Halimi.
