3 subjekte që ushtronin aktivitetin pa kushte higjenike janë bllokuar pas kontrolleve te vazhdueshme të Autoritetit Kombëtar të Ushqimit në jug të vendit.
Siç duket edhe në pamje këta subjekte ishin jashtë çdo standarti për plotësimin e kushteve të përshtatshme higjeno-sanitare, mangësi në dokumentacion dhe pa licensë.
AKU gjithashtu ka ndëshkuar me 3.85 milion lekë kundravajtjet ligjore në furrë buke, market e fast food.
Njoftimi:
AKU kontrolle rigoroze në jug të vendit, ndërpret aktivitetin e 3 subjekteve, bllokon dhjetra kg produkte të pasigurta për konsum dhe ndëshkon me 3.85 milion lekë kundravajtjet ligjore në furrë buke, market e fast food.
Task Forca e ngritur pranë Drejtorisë së Përgjithshme të Autoritetit Kombëtar të Ushqimit në bashkëpunim me Drejtorinë Rajonale të AKU Vlorë kanë kryer një sërë kontrollesh për të garantuar sigurinë ushqimore dhe për të siguruar vijimin e mbarëvajtjes së sezonit turistik veror.
Nga kontrollet e kryera në këto subjekte u konstatua: ushtrim aktiviteti i palicencuar, kushte të papërshtatshme higjeno-sanitare, mangësi në dokumentacion (gjurmueshmëri, plani HACCP, raport analiza), si dhe etiketim i parregullt i produkteve.
Për shkeljet e konstatuara, AKU mori masat administrative si në vijim: 10 masa administrative “Gjobë” me vlerën totale 3,850,000 lekë, “Bllokim i produkteve” të pasigurta për konsum human, si dhe “Ndërprerje e menjëhershme e aktivitetit” për 3 subjektet.
Siguria ushqimore është sfida jonë e përbashkët!
