Presidenti i vendit Ilir Meta ka kthyer pas një tjetër ligj të votuar nga parlamenti shqiptar për Akademinë e Shkencave. Kreu i Shtetit publikoi bashkë me vendimin dhe argumentet e rishikimit të ligjit.
Sipas arsyetimit të Metës, ky ligj ‘cënon kompetencat e Presidentit të Republikës dhe autoniminë e institucioneve të larta arsimore në vendin tonë’. Pas refuzimit të dekretimit të VKM-së për koncesionin e rrugës Milot-Balldren si dhe ligjit për Koncesionet, presidenti i jep një tjetër goditje qeverisë së majtë.
NJOFTIM
9 gusht 2019
Presidenti Meta dekreton kthimin për rishqyrtim në Kuvend të ligjit nr. 53/2019
“Për Akademinë e Shkencave të Republikës së Shqipërisë”
Institucioni i Presidentit të Republikës bën me dije se, Presidenti i Republikës Sh.T.Z Ilir Meta, në ushtrim të kompetencave të Tij, në mbështetje të neneve 85, pika 1 dhe 93, të Kushtetutës,
me Dekretin nr. 11256, datë 08.08.2019, ka vendosur:
Kthimin për rishqyrtim në Kuvend, të ligjit nr. 53/2019, “Për Akademinë e Shkencave në Republikën e Shqipërisë”, me qëllim rishikimin dhe përmirësimin e pikës 1 të nenit 3, pikës 3, 7 dhe 14 të nenit 4, pika 3 e nenit 6, pikat 5 dhe 6 të nenit 11, pika 1 e nenit 15, si dhe pikës 1 të nenit 19, sipas arsyetimit bashkëlidhur këtij dekreti.
Në përfundim të shqyrtimit të këtij ligji, Presidenti i Republikës, ka arritur në përfundimin se, ligji nr. 53/2019 “Për Akademinë e Shkencave të Republikës së Shqipërisë”:
- bie ndesh me parashikimet e Kushtetutës së Republikës së Shqipërisë;
- cenon autonominë e institucioneve të arsimit të lartë;
- cenon kompetencat e Presidentit të Republikës;
- nuk është në harmoni me kuadrin ligjor ekzistues në Republikën e Shqipërisë.
