Këshilltari i presidentit Ilir Meta ka reaguar lidhur me shkarkimin e Gjeneral Major Ylber Dogjanit nga detyra e Komandantit të Forcave Detare.
Në reagimin e Presidencës thuhet se Dogjani u largua për shkak se i mbaroi mandati dhe “lirimi i tij nuk ka lidhje me asnjë pretendim tjetër, të ngritur dhe në disa media, se shkarkimi gjoja lidhet me shkelje ligjore.”
Këshilltari bën të ditur se presidenti e ka shkarkuar atë nga detyra vetëm për shkak të mbarimit të mandatit, pasi pretendon se ai nuk ka bërë asnjë shkelje ligjore.
Reagimi i Bahri Shaqirit:
Gjeneral Major Ylber Selman Dogjani është shkarkuar nga detyra e Komandantit të Forcave Detare, vetëm për shkak të mbarimit të mandatit.
Lirimi i tij nuk ka lidhje me asnjë pretendim tjetër, të ngritur dhe në disa media, se shkarkimi gjoja lidhet me shkelje ligjore.
Presidenti i Republikës nëse do kishte patur bindjen për një shkelje ligjore sado të vogël nga Gjeneral Major Dogjani, do e kishte shkarkuar atë menjëherë, dhe jo kur të plotësonte afatin e tij në krye të Forcave Detare.
Presidenti Meta shpreson se pasuesi i Gjeneral Major Dogjanit i cili do t’i propozohet në këtë detyrë, jo vetëm të ketë integritetin e duhur, por të jetë plotësisht i karrierës në Forcat Detare.
Një nga detyrat kryesore të Presidentit është edhe mbrojtja e integritetit të ushtarakëve nga presionet dhe lojrat politike.
