Kryetari i opozitës komenton deklaratën e kryeministrit Rama për mundësinë e referendumit për miratimin e reformës në drejtësi
Kryetari i PD-së Lulzim Basha, e cilësoi referendumin një mundësi e shkëlqyer për vendin pasi kjo do të çonte në zgjedhje të parakohëshme. Duke iu referuar deklaratës së kryeministrit Rama se reforma në drejtësi mund të miratohet edhe me referendum, Basha tha se referendumi e ka emrin zgjedhje të parakohshme, shansi që qytetarët të japin gjykimin e tyre përfundimtar për qeverisjen e tij të dështuar, të korruptuar dhe kriminale. Në përgjigje të akuzave të Ramës se opozita është e prirur për pazare në vënd të konsensusit për reformën në drejtësi, Basha tha se Rama e quan pazar konsensusin që kërkon komisioni i Venecias për reformën në drejtësi.
“Kush e quan pazar konsensusin që kërkon komisioni i Venecias për reformën në drejtësi?! Tregtari i paskrupullt i politikës, spekulanti më i madh i pazareve më të pista në vend, ai që ka bërë pakt me krimin, themeluesi i aleancës së qelbësirave, ai që i zvarritej Nanos dhe i përkuljes Metës kur ia lypte nevoja dhe sa kalonte lumin ngrinte kurthe për ta, politikani që ska mbajtur një fjalë apo një premtim që ditën e parë e deri më sot.E quan pazar konsensusin, njeriu që futi kriminelët në bashki, zyra publike e Parlament, erdhi me ta në pushtet e ndau pushtetin me ta.
E quan pazar konsensusin për drejtësinë, kumbari i pazareve me doganat dhe tatimet, me shullazët dhe habilajt, me tenderat dhe koncesionet, me papulët dhe carapulët, nushët e beqët. Konsensusi që kërkon komisioni i Venecias, është rruga që e shpëton drejtësinë nga kapja politike. Konsensusi zhduk pazarin, është e kundërta e tij. Pikërisht, kësaj i druhet Rama, ky është temjani që e tremb atë”, tha Basha.
