Në 11 pikat e ndryshimeve nuk janë shqetësimet reale të biznesit
Qeveria shqiptare ka bërë gati një plan veprimi të posaçëm për të përmirësuar klimën e biznesit për investimet e huaja. Situata e acaruar vecanërisht në muajt e fundit ka marrë si një reagim shtetëror një plan me 11 masa e veprime në favor të investimeve. Por ajo që bie në sy në planin e qverisë është se në të nuk janë pothuajse fare të pasqyruara shqetësimet që biznesi ka aktualisht e në mënyrë të vecantë nuk parashikohet asnjë lehtësim nga barra e lartë e taksave. Pwr vitet 2016-2020 qeveria parashikon të ndërhyjë për thjeshtimin e hyrjes në treg të një biznesi, shkurtimin e kohës për lejet e ndërtimit, përmirësimin e furnizimit me energji, thjeshtimin e regjistrimit të pasurive, reduktimin e burokracive, fuqizimin e teknologjisë e deri përmirësimin e kushteve për konkurencë. Por në shqetësimet e biznesit ka të tjera “halle”. Dhomat e tregtisë së bizneseve gjermane e amerikane në Shqipëri vlerësojnë se shqetësimet reale janë trajtimi jo i duhur fiskal dhe ligjor, mosrespektimi i kontratave, paqëndrueshmëria e administratës publike etj. Dhe më kryesorja është se Shqipëria nuk po arrin të tërheqë investitorë të huaj për shkak të nivelit të lartë të korrupsionit si edhe për barrën më të madhe të taksave.
