Prokuroria ka vendosur të pushojë hetimet për dosjen ndaj Baftjar Brukës dhe Vladimir Gjutës të akuzuar për vënien e tritolit në farmacinë e të atit të ministrit Tahiri. Vendimi ka ardhur për shkak të mungesës së provave që implikojnë dy të akuzuarit.
“Gjatë zhvillimit të hetimeve janë kryer një sërë veprimesh proceduriale, përfshirë edhe ekspertiza të specializuara në bashkëpunim me partnerët ndërkombëtarë, në përfundim të të cilave nuk u provua shkencërisht dhe nuk u siguruan fakte që të provonin përtej çdo dyshimi të arsyeshëm se të arrestuarit ishin organizatorë dhe ekzekutorë të akteve të mësipërme.
Krahas faktit që nuk janë arritur të grumbullohen të dhëna konkrete mbi veprimet e të hetuarve për kryerjen e veprave penale, Prokuroria për Krime të Rënda nuk zbuloi motiv se përse këta shtetas mund të kryenin veprat penale për të cilat dyshoheshin.
Ndërkohë, ndaj të hetuarve Vladimir Gjuta dhe Baftjar Bruka vijon të jetë në fuqi masa e sigurimit ”arrest në burg” vendosur nga Gjykata e Rrethit Gjyqësor Kukës, për vepra të tjera penale, të cilat janë nën hetim nga Prokuroria e Kukësit”, sqaron prokuroria.
Rreth një vit më parë, në farmacinë në pronësi të Bashkim Tahirit, u vendos një sasi tritoli, e cili shkaktoi dëmë materiale. Për këtë ngjarje u akzuuan Vladimir Gjuta dhe Baftjar Bruka. Gjuta u arrestua pak muaj pas ngjarjes ndërsa Bruka u ekstradua nga Suedia pak muaj më parë.
