Vonesa mbi 10 ditë e skualifikon kandidatin nga përzgjedhja
Në vijim të procedurës për zgjedhjen e anëtarëve të rinj të Gjykatës Kushtetuese, Presidenti Nishani ka ftuar të gjithë të interesuarit të dorëzojnë formularët e vetëdeklarimit. Sipas një njoftimi të publikuar në faqen e presidencës të vonuarit do të humbasin të drejtën e konkurimit për dy vendet vakante. Në njoftim thuhet: “Në vijim të komunikimit të datës 31 mars 2016, për fillimin e procedurave për emërimin e dy anëtarëve të rinj në Gjykatën Kushtetuese, si dhe në zbatim të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, njoftohen të gjithë subjektet e interesuara që kanë paraqitur kërkesat e tyre për t’u emëruar si gjyqtarë kushtetues, brenda datës 8 prill 2016, të dorëzojnë formularin e vetëdeklarimit pranë Institucionit të Presidentit të Republikës. Formulari i vetëdeklarimit të plotësohet sipas modelit të miratuar me vendim të Kuvendit të Shqipërisë dhe të dorëzohet brenda 10 ditëve, nga ky njoftim. Refuzimi për të dorëzuar formularin e vetëdeklarimit, ose mosparaqitja e tij përbën shkak për mosemërim në funksionin publik”.
